|
.jpg)
Төрийн алба, удирдлагын сургууль (ТАУС) нь төр, нийгэм, бизнесийн удирдлагаар мэргэшүүлэх, дахин мэргэшүүлэх, мэргэшлийг нь дээшлүүлэх урт, богино хугацааны сургалтыг танхимын болон зайн сургалтын хэлбэрээр эрхлэн зохион байгуулах үүрэг бүхий Удирдлагын академийн бүрэлдэхүүний сургууль юм. Сургууль нь төр, бизнес, нийгмийн удирдлагаар мэргэшүүлэх болон хамтарсан сургалтын хөтөлбөртэй.
МЭРГЭШҮҮЛЭХ ДИПЛОМЫН СУРГАЛТ
Мэргэшүүлэх дипломын сургалт нь мэргэшлийн мэдлэг, ур чадвар олгох, бакалаврын дараах сургалт байна. Мэргэшүүлэх дипломын сургалтад суралцагч нь тухайн мэргэшлийн хүрээнд тодорхой чиглэлээр гүнзгийрэн мэргэших ба төр, төрийн бус, бизнесийн байгууллагын дунд түвшний удирдах албан тушаалд ажиллах мэдлэг, ур чадвар эзэмшиж төгсөнө.
Элсүүлэх мэргэшлийн чиглэл
- Төрийн удирдлага
- Бизнесийн удирдлага
- Нийгмийн удирдлага
Суралцах хэлбэр
- Өдрөөр суралцах
- Гарагаар суралцах
- Улирлаар суралцах
Хичээлийн жил нь тус бүр хичээлийн 7 долоо хоног, шалгалтын 1 долоо хоног бүхий 4 улирлаас бүрдэнэ. 1 ба 3 дугаар улирал эхлэхийн өмнө чиглэл олгох хичээлийн долоо хоног байна.
Суралцагчид нийт 22 багц цаг биелүүлэх ёстой ба тус тусын мэргэшлээр суурь хичээлүүдээ (6 багц цаг) үзэж дууссаны дараа мэргэшүүлэх хичээлээ (10 багц цаг) судална. Ерөнхий ур чадварын хичээлээс 3-5 багц цаг биелүүлэх ёстой ба төгсөлтийн шалгалт (1 багц цаг) өгөх буюу бүлгийн судалгааны тайлан (3 багц цаг) бичиж хамгаалан төгсөнө.
Төрийн удирдлагаар мэргэшүүлэх сургалтад суралцагч нь:
- Нутгийн удирдлага
- Төрийн санхүү
- Төрийн алба, хүний нөөцийн удирдлагын чиглэлээр мэргэших боломжтой.
Бизнесийн удирдлагаар мэргэшүүлэх сургалтад суралцагч нь:
- Стратегийн удирдлага
- Санхүүгийн удирдлага
- Маркетингийн удирдлагын чиглэлээр мэргэших боломжтой
Нийгмийн салбарын удирдлагаар мэргэшүүлэх сургалтад суралцагч нь:
- Нийгмийн үйлчилгээ
- Хүн ам, хөгжлийн чиглэлээр мэргэших боломжтой
Мэргэшлийн суурь болон мэргэшүүлэх хичээлээ үзэж судалж байх явцдаа ерөнхий ур чадвар олгох, тухайлбал, Судалгааны арга зүйн үндэс, Судалгааны бичлэг, илтгэх ур чадвар, Харилцааны ур чадвар зэрэг хичээлүүдийг үзэж судална.
Шаардлагатай бүх хичээлүүдээ үзэж, багц цагийг биелүүлсэн суралцагчид төгсөлтийн шалгалт өгнө. Харин судалгааны арга зүй сайн эзэмшсэн, цаашид үргэлжлүүлэн судалгааны ажил хийх суралцагчийг холбогдох тэнхимийн саналаар төгсөлтийн шалгалтаас чөлөөлж, Бүлгийн судалгааны ажилд оролцуулж болно. Судалгааны бүлэг нь тэнхимийн багш нарын удирдлага дор тодорхой сэдвээр судалгаа хийж, тайлан бичиж хамгаална.
|
